మార్చి 17న తిరుమలలో వీఐపీ బ్రేక్ దర్శనాలు రద్దు..

కలియుగ ప్రత్యక్ష దైవం తిరుమల శ్రీవారి ఆలయంలో మార్చి 17న కోయిల్‌ ఆళ్వార్‌ తిరుమంజనం నిర్వహించనున్నట్టు తిరుమల తిరుపతి దేవస్థానం ఒక ప్రకటనలో వెల్లడించింది. ఈ క్రమంలోనే తిరుమల శ్రీవారి ఆలయంలో ఆ రోజు వీఐపీ బ్రేక్ దర్శనాలు రద్దు చేస్తున్నట్టు పేర్కొంది. భక్తులు ముఖ్యంగా ఈ విషయాన్ని గమనించాలని పేర్కొంది. తిరుమలలో కోయిల్ ఆళ్వార్ తిరుమంజనం తిరుమల శ్రీ వేంకటేశ్వరస్వామి వారి ఆలయంలో మార్చి 19న ఉగాది ఆస్థానాన్ని పుర‌స్క‌రించుకుని మార్చి 17వ తేదీ మంగళవారం కోయిల్‌ ఆళ్వార్‌ తిరుమంజనం జ‌రుగ‌నుంది. ఉగాది, ఆణివార ఆస్థానం, బ్రహ్మోత్సవం, వైకుంఠ ఏకాదశి పర్వదినాల ముందు వ‌చ్చే మంగళవారం కోయిల్‌ ఆళ్వార్‌ తిరుమంజనం నిర్వహించ‌డం ప్రతీ సంవత్సరం తిరుమలలో కొనసాగుతున్న ఆనవాయితీ.